Month: ६ महिना अगाडि

काठमाडौं, असार ६ – लोकप्रिय गायक दिपेन श्रेष्ठको स्वरमा रहेको नयाँ गीत ‘ठिकै छ मेरी प्रिय’ को भिडियो शुक्रबार एक विशेष कार्यक्रमबीच सार्वजनिक गरिएको छ। ड्रागन मोसन पिक्चरको प्रस्तुति रहेको यो म्युजिक भिडियो प्रेम, पीडा र भावनात्मक द्वन्द्वको कथा बोकेको छ।

अनुजा बरालको निर्देशनमा बनेको यस भिडियोमा गुरु वसिष्ठ, प्रेम परियार र श्रितिका श्रेष्ठको सशक्त अभिनय देख्न सकिन्छ। गीतको शब्द शेखर थापाले लेखेका हुन् भने संगीत दिवेश राईको रहेको छ। गीतलाई स्वयं अभिनेता गुरु वसिष्ठले नै गाएका छन्, जसले दर्शक–श्रोताको भावनालाई अझ प्रभावशाली बनाएको निर्माण पक्षको भनाइ छ।

भिडियोको प्राविधिक पक्ष पनि सशक्त छ। सत्यम रानाले भिडियोमा दृश्य प्रभाव (VFX) को जिम्मा सम्हालेका छन्, राजेन्द्र मोक्तानले रंग संयोजन गरेका छन् भने सारथी थापाले छायांकन गरेका छन्। भिडियोलाई सर्वेश शाहले सम्पादन गरेका हुन्।

‘ठिकै छ मेरी प्रिय’ गीतको भिडियो ड्रागन मोसन पिक्चरको आधिकारिक युट्युब च्यानलमार्फत हेर्न सकिनेछ।

काठमाडौं, असार ५ – बहुप्रतिक्षित नेपाली फिल्म ‘मोहर’ को पहिलो गीत सार्वजनिक भएको छ। “चाहिँदैन मोहर, पर्दैन सुकी” बोलको यस गीतमा प्रेमभाव प्रकट गरिएको छ, जहाँ प्रेमी-प्रेमिकाको सम्बन्धलाई चित्रण गरिएको छ।

गीतमा सरद हुमागाइँ र विशाखा साहीको स्वर सुन्न सकिन्छ भने शब्द प्रमोद ढुंगानाको रचना हो। संगीतकार सुरेश अधिकारीले सुमधुर धुन भरेका छन्।

गीतको भिडियोमा मुख्य कलाकार पल शाह र नीति शाहलाई रोमान्टिक शैलीमा प्रस्तुत गरिएको छ। भिडियोलाई रोमान्टिक ढंगले निर्देशन गरिएको छ, जसले दर्शकको मन छुने अपेक्षा गरिएको छ।

फिल्म ‘मोहर’ को कथा निर्देशक ओम प्रतीकले लेखेका हुन्। उनी स्वयं यस फिल्मका निर्देशक पनि हुन्। समाजमा गहिरो जरा गाडेर बसेको देउकी प्रथाको विरुद्ध आवाज उठाउँदै फिल्मले महत्वपूर्ण सामाजिक सन्देश दिन खोजेको देखिन्छ।

फिल्ममा पल र नीतिसँगै बेनिशा हमाल, बाल–कलाकार सारा शर्मा, अर्जुनजंग शाही, मिथिला शर्मा, रवीन्द्र झा, लक्ष्मी गिरी, मिस पबी, सुशील देवकोटा, लक्ष्मीनाथ तिमिल्सिना, सिद्धार्थ सिंह, माधव दत्त पण्डित, गीता थापा, नविन खतिवडा लगायत कलाकारहरूको अभिनय देख्न पाइनेछ।

फिल्म साउन २३ गतेबाट देशभर प्रदर्शनमा आउने तयारीमा छ।
चुम्बनजंग शाही फिल्मका निर्माता हुन् भने रोशनजंग शाही लाइन प्रोड्युसरको भूमिकामा छन्।

फिल्ममा कुमार महर्जनको एक्सन निर्देशन, कविराज गहतराज र रामजी लामिछानेको कोरियोग्राफी, समीर मियाको VFX, सत्यम रानाको CGI, भुपेन्द्र अधिकारीको सम्पादन, र दिपेन बस्न्यातको छायांकन रहेको छ। संगीतमा सुरेश अधिकारीसँगै थानेश्वर गौतम र एसडी योगीको पनि टोलो रहेको छ।

फिल्म ‘मोहर’ले नेपाली समाजको यथार्थ र भावनात्मक सम्बन्धको कथा उजागर गर्दै मनोरञ्जनसँगै सन्देश दिन खोजेको छ।

काठमाडौं, असार ४ – निर्देशक सुदर्शन थापा अब अभिनेता प्रदीप खड्कासँग मिलेर नयाँ चलचित्र ‘शुभ विवाह’ निर्माण तथा निर्देशन गर्ने भएका छन्। चलचित्र विकास बोर्डमा नाम दर्ता गर्दा अभिनेता खड्काको नाम मुख्य कलाकारका रूपमा उल्लेख गरिएको छ।

यसअघि दश वर्षअघि सुपरहिट चलचित्र ‘प्रेमगीत’ मा सहकार्य गरेका यी दुईले अब ‘शुभ विवाह’ मा दोस्रोपटक साथ दिने तयारी गरेका हुन्। निर्देशक थापाका अनुसार अभिनेता खड्कासँग गत वर्ष नै लिखित सम्झौता भइसकेको थियो, तर फिल्मको नाम सार्वजनिक गरिएको थिएन।

थापाले ‘प्रेमगीत’लाई सम्झिँदै भने, “त्यो चलचित्रले धेरै कलाकार तथा प्राविधिकहरूको करियरको बाटो खोल्यो, जसमा प्रदीप खड्का पनि प्रमुख थिए। अहिले उनी नेपाली फिल्म क्षेत्रका स्टार नायक हुन्।”

‘शुभ विवाह’ एक प्रेम कथामा आधारित पारिवारिक चलचित्र हुनेछ, जसमा नेपाली धर्म, संस्कृति र सामाजिक मूल्य–मान्यतालाई आत्मसात् गरिएको निर्देशक थापा बताउँछन्। यो चलचित्रले परम्परागत विवाह संस्कारलाई कथानकको केन्द्रमा राख्नेछ।

यद्यपि चलचित्रमा अभिनेत्रीको नाम अझै सार्वजनिक गरिएको छैन। निर्देशक थापाको टोलीले चाँडै नै अभिनेत्रीसहित सम्पूर्ण कलाकार र प्राविधिक टुंगो लगाएर छायांकन सुरु गर्ने तयारी गरिरहेको स्रोतले जनाएको छ।

थापा प्रेम कथामा आधारित चलचित्र बनाउन सफल मानिन्छन्। उनका चर्चित फिल्महरूमा ‘मेरो एउटा साथी छ’, ‘प्रेमगीत’ र ‘म यस्तो गीत गाउछु’ जस्ता चलचित्रहरू पर्छन्। उता, अभिनेता प्रदीप खड्का पनि ‘लभर ब्वाई’ भूमिकामा अत्यन्त लोकप्रिय छन्।

अब हेर्न बाँकी छ — प्रेमगीतको जस्तो सफलता ‘शुभ विवाह’ दोहोर्याउन सक्नेछन् कि भन्ने कुरा।

काठमाडौं :-जेठ ३१,गायक युवराज छन्त्यालको स्वर, शब्द र संगीतमा सजिएको नयाँ लोकलयात्मक गीत ‘किन पीर मान्छौँ’ सार्वजनिक गरिएको छ। मायाप्रेम र समर्पण झल्किने भावपूर्ण गीतमा गायक छन्त्याललाई लोकप्रिय गायिका देवी घर्तीले साथ दिएकी छन्।

गीतमा प्रेमिल भावनालाई कलात्मक ढंगले प्रस्तुत गरिएको छ, जहाँ प्रेमीले आफ्नी प्रेमिकालाई निराश नहुन, पीर नमान्न आग्रह गरेका छन्। कुमार थापाको एरेन्ज, मिक्सिङ र मास्टरिङमा तयार भएको यस गीतको भिडियो पनि उत्कृष्ट रूपमा निर्माण गरिएको छ।

भिडियोको निर्देशन शिवम पोखरेलले गरेका छन् भने अभिनयमा नविन सिरिस, सगुन शाही, रेनुका आले, वसन्तराज गौतमलगायत कलाकारहरू देख्न सकिन्छ। गीतको भावनालाई अभिनयले राम्रोसँग समर्थन दिएको छ।

सुरज खनाल र राजु घलेको छायांकन रहेको भिडियोलाई सरोज शाहीले सम्पादन गरेका छन्। भिडियो गायक युवराज छन्त्यालकै युट्युब च्यानलमार्फत हेर्न सकिन्छ।

काठमाडौं, जेठ ३१ – तेलुगु, हिन्दी र तमिल भाषाका चर्चित अभिनेता प्रदीप रावत अब नेपाली फिल्ममा पनि अभिनय गर्दैछन्। निर्देशक चन्द्र पन्तको निर्देशनमा निर्माण हुँदै गरेको नयाँ नेपाली फिल्म ‘आ बाट आमा’ मा उनी पल शाहका बुवाको भूमिकामा अनुबन्ध भएका हुन्।

निर्देशक पन्तले रावतको अनुबन्धनबारे जानकारी दिँदै भने, ‘यो फिल्म नितान्त नेपाली लोक र परिवेशमा आधारित छ। प्रदीपजीले नेपाली शैलीमै पल शाहका बाबुको भूमिका निर्वाह गर्नुहुनेछ।’

यसअघि रावतले निर्देशक पन्तकै फिल्म ‘ह्रस्व दीर्घ’ मा नीता ढुंगानाकी बुवाको भूमिकामा अभिनय गरेका थिए, जुन क्यारेक्टर दर्शकले मन पराएका थिए। यही सफल सहकार्यलाई निरन्तरता दिँदै उनी अब ‘आ बाट आमा’ मा देखिन लागेका हुन्।

फिल्ममा प्रदीप रावतसँगै अभिनेत्री विपना थापा र अभिनेता पल शाह पनि अनुबन्ध भइसकेका छन्। विपना थापाले ‘ह्रस्व दीर्घ’ मार्फत १६ वर्षपछि नेपाली रजतपटमा पुनरागमन गरेकी थिइन् र अब निर्देशक पन्तकै दोस्रो फिल्ममा पुनः सहकार्य गर्दैछिन्।

अभिमन्यू निरवीले लेखेको स्क्रिप्टमा आधारित यो फिल्म भदौदेखि फ्लोरमा जाने तयारीमा रहेको निर्माण पक्षले जनाएको छ। अन्य कलाकार र प्राविधिक टिमको टुंगो पनि चाँडै लाग्ने निर्देशक पन्तको भनाइ छ।

फिल्मको थिम पोस्टर दुई साता अघि सार्वजनिक भइसकेको छ भने निर्माण टिमले फागुन १५ गतेलाई प्रदर्शन मितिको रूपमा घोषणा गरिसकेको छ।

📸 तस्बिर: सुरेन्द्र थापा

काठमाडौं जेठ-२९, गायिका सुमी पराजुलीको स्वरमा सजिएको नयाँ म्युजिक भिडियो ‘ढाँट्यो मायाले’ सार्वजनिक हुने तयारीमा रहेको छ। एसपी क्रिएशनको ब्यानरमा निर्माण भएको यस गीतमा अलिशा बास्तोला र गौरव हमालको दमदार अभिनय देख्न पाइनेछ।

गीतको निर्देशन तथा लेखन मुस्कान ढकालले गरेका हुन्। ढाँट्यो मायाले शीर्षकले नै प्रेममा आएको धोका, भावनात्मक उतार–चढाव र विछोडको संकेत गर्दछ। पोस्टरमा देखिएअनुसार गीत ग्रामिण सौन्दर्य, प्रेम र करुणाको संयोजनमा आधारित हुनेछ।

गीतको शब्द, संगीत तथा एरेञ्ज दीपकराज विश्वकर्माले गरेका हुन् भने रेकर्डिङ चन्द्रमान विश्वकर्माले गरेका छन्। सुमी पराजुलीको प्रस्तुति रहेको यस गीतको (BTS) आशिष चापागाईं र सुवास बयलकोटीले गरेका हुन् भने दिपक गिरीले छायांकन सम्हालेका छ्न ।

भिडियोमा अमीर के.सी सहायक निर्देशकका रूपमा रहेका छन्। मेकअप आर्टिस्ट रोजिना श्रेष्ठ, प्रोडक्सन इन्चार्ज सुरज ओली, र ड्रेस डिजाइन तानी थापाको रहेको छ। गीतको पोस्टर SD HOUSEले तयार पारेको हो।

‘ढाँट्यो मायाले’ युट्युब, फेसबुक, स्पोटिफाइ, अमेजन म्युजिकलगायत विभिन्न डिजिटल प्लेटफर्ममा चाँडै सार्वजनिक हुने जनाइएको छ। गीतले दर्शकको मन छुने भावनात्मक कथा र दृश्य प्रस्तुत गर्ने अपेक्षा गरिएको छ।