काठमाडौं, साउन २९:-फरक-फरक शैलीका सफल चलचित्रहरू निर्देशन गरेर नेपाली फिल्म क्षेत्रमा आफ्नो पृथक पहिचान बनाइसकेका निर्देशक मिलन चाम्स अब नयाँ प्रेमकथात्मक चलचित्र ‘सुम्निमा’ को तयारीमा जुटिरहेका छन्। गोर्खा फिल्म्स र चाम्स इन्टरटेन्मेन्टको संयुक्त लगानीमा बन्न लागेको चलचित्रमा नव–अभिनेता कुन्साङ बमजन मुख्य भूमिकामा अनुबन्ध भएका छन्।
चलचित्र ‘सुम्निमा’ मार्फत डेब्यु गर्न लागेका कुन्साङ बमजनले निर्देशक चाम्सको फिल्ममा अभिनय गर्न पाउनु आफैंमा गर्वको विषय भएको प्रतिक्रिया दिएका छन्। उनले “यो मेरो लागि सपना पूरा जस्तै हो। निर्देशक चाम्सजस्तो अनुभवी व्यक्तिसँग काम गर्न पाउनु सौभाग्य हो। म दिलोज्यानले मेहनत गरेर आफ्नो क्षमताको प्रमाण दिन चाहन्छु,” भन्दै उत्साह व्यक्त गरेका छन्।
चलचित्रकी मुख्य अभिनेत्रीको रूपमा उपासना सिंह ठकुरी अनुबन्ध भइसकेकी छन्। कुन्साङ र उपासनाको नयाँ जोडी दर्शकको लागि नयाँ स्वाद र उत्सुकताको विषय बन्ने विश्वास लिइएको छ।
चलचित्र ‘सुम्निमा’ को शीर्षक सुन्दा नारी केन्द्रित लागे पनि निर्देशक चाम्सका अनुसार यो शुद्ध प्रेमकथामा आधारित फिल्म हुनेछ। उनले भने, “फिल्मको नाम नेपाली संस्कार, भाव र सौन्दर्य बोकेको छ, तर कथा प्रेममा केन्द्रित हुनेछ। यसको प्रस्तुति इन्टरनेशनल लेभलको बनाउने तयारीमा छौं।”
राजीव थापाको लेखनमा तयार हुँदै गरेको चलचित्रको छायांकन आगामी अगस्टमा नेपाल र लण्डनमा गरिने निर्देशक चाम्सले जानकारी दिएका छन्। हाल चलचित्रको अन्य कलाकार तथा प्राविधिक टोली छनोटको प्रक्रिया जारी रहेको छ।
यसबाहेक चाम्सद्वारा निर्देशित पछिल्लो चलचित्र ‘अञ्जिला’ ले नेपाली बायोपिक फिल्ममा सबैभन्दा बढी व्यापार गर्ने रेकर्ड बनाएको थियो, जसले बक्स अफिसमा ब्लकबस्टर सफलता हासिल गरेको थियो।
