काठमाडौं, असार २ – नेपाली फिल्म सिटामोल को पहिलो गीत ‘झुम्का कानैमा’ दर्शकमाझ आएको छ। सांगीतिक शैलीमा देउडा र लोक भाकाको मिठास मिसाइएको यस गीतले पारम्परिक हुड्के नाचको झल्को पनि दिन्छ।

गीतको भिडियोमा मुख्य कलाकारहरू सौगात मल्ल र बेनिशा हमाललाई रमाइला लयमा थिरकिरहेको देख्न सकिन्छ। संगीत र स्वर बाबुल गिरीको छ, शब्द गोविन्द भट्टले लेखेका हुन् भने गायनमा शान्तिश्री परियारले साथ दिएकी छन्।

गीतको छायांकन प्रविन सिंहले गरेका हुन् र नृत्य निर्देशनमा अनुभवी कविराज गहतराजको संयोजन देखिन्छ। गीत राजधानीमा आयोजित एक कार्यक्रममार्फत सार्वजनिक गरिएको हो।

फिल्मको निर्देशन राज बहादुर सानेले गरेका हुन्। निर्देशक सानेले उक्त कार्यक्रममा बोलेका कुरा अनुसार, सिटामोल उनको जीवनको खास प्रोजेक्ट हो र यसले चलचित्र क्षेत्रमा उनको बाटो परिवर्तन गर्ने विश्वास छ।

सिटामोल मा सौगात र बेनिशासँगै श्रीकृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, काजल भुजेल लगायत थुप्रै कलाकारको अभिनय रहनेछ। बालकलाकारका रूपमा करण परियार र आराध्या डिसी पनि देखिनेछन्।

फिल्मको कथा निर्देशक साने र लेखक प्रदीप भट्टार्इको सहलेखनमा तयार भएको हो। निर्माण पक्षमा तुल्सी देवी फिल्म प्रा.लि. र जुनतारा फिल्म्सको सहकार्य रहेको छ। सिनेमामा सिमोस सुनुवारको प्रस्तुति, दिव्य सुवेदीको छायांकन, बन्दे प्रसादको सम्पादन, र रंग संयोजन राजेन्द्र मोक्तानले सम्हालेका छन्।

फिल्म साउन २३ गतेबाट देशभर प्रदर्शनमा आउन तयारीमा छ।