विदेशमा ‘आ बाट आमा’को प्रदर्शनमा उच्च माग, चार देशमा सोल्ड आउट

आर्या इन्टरटेन्मेन्टले निर्माण गरेको फिल्म ‘आ बाट आमा’ को युएई, कतार, बहराइन र इजरायलमा प्रदर्शन अधिकार बिक्री भइसकेको छ। निर्माण पक्षले बिहिबार चारै देशमा आफ्नो फिल्म सोल्ट आउट भएको जानकारी दिएको छ।

यसअघि फिल्मलाई हिमारु इन्टरटेन्मेन्ट प्रा. लि. ले अस्ट्रेलिया र न्युजिल्याण्डको प्रदर्शन अधिकार लिइसकेको थियो। पछिल्लो समय फिल्मको विदेशमा उच्च माग बढेको देखिन्छ।

फिल्मका निर्देशक चन्द्र पन्त का अनुसार विदेशी बजारबाट आएको उत्साहप्रद प्रतिक्रिया नेपाली फिल्मका लागि सुखद संकेत हो।

निर्देशक चन्द्र पन्तको कथा तथा निर्देशनमा निर्माण भएको यो फिल्ममा विपना थापा, प्रदीप रावत, पल शाह, साईग्रेस पोखरेल, अंशु महर्जन, सिम्रन पन्त, उषा उप्रेती, विशाल पहाडी, रविन्द्र झा, गजित बिष्ट, हेमराज अधिकारी, दिलिप उखेडा, रचना गौतमको अभिनय रहेको छ।

फिल्मले आमाको संघर्ष, जिम्मेवारी र समाजले आमाप्रति देखाउने व्यवहारलाई केन्द्रमा राखेको छ। फिल्मको ‘बा आमाले पसिनाले घर बनाउनु भयो, हामीले रहर र बाध्यता ‘पासपोर्ट’ बनाउनु पर्यो’ भन्ने स्लोगनले दर्शकको ध्यान खिचेको छ। यसले आमा–बुबाप्रति छोराछोरीबीचको गहिरो भावनालाई चित्रण गरेको बुझ्न सकिन्छ।

नेपालमा फिल्मको वितरण अधिकार आरआर फिल्म्सले पाएको छ भने डिजिटल अधिकार ओएसआरलाई रहेको छ। आगामी माघ १६ गतेबाट अल नेपाल प्रदर्शनमा आउने तयारीमा रहेको फिल्मले निर्देशक चन्द्रलाई निकै उत्साहित बनाएको छ।

उनको डेब्यु निर्देशनमा निर्माण भएको फिल्म ‘ह्रस्वदीर्घ’ गत वर्ष सफल प्रदर्शनमा आएको थियो।

Share Post on Social media