चर्चित हास्य कलाकार केदार घिमिरे ‘माग्ने बुढा’ र लोकप्रिय अभिनेत्री वर्षा सिवाकोटीको मुख्य अभिनय रहेको नेपाली सिनेमा ‘माग्ने राजा’को पहिलो गीत सार्वजनिक भएको छ।

मंगलबार सार्वजनिक गरिएको डान्सिङ नम्बर ‘त्यो मिठो जोवन’मा दीपक शर्माको शब्द-संगीत, रचना रिमाल र सविन सुवेदीको सुमधुर स्वर सुन्न सकिन्छ। गीतमा कविराज गहतराजको कोरियोग्राफी रहेको छ भने केदार र वर्षाको जोडीलाई भिडियोमा प्रस्तुत गरिएको छ।

गीतको भिडियोलाई मित्र डी गुरुङले सम्पादन गरेका छन् भने छायांकन नरेन्द्र मैनालीले गरेका हुन्। गीतको भिडियो आकर्षक बनेको छ, जसले दर्शकको मन जित्ने अपेक्षा गरिएको छ।

सिनेमाबाट निर्देशक ऋषि लामिछाने ८ वर्षपछि निर्देशनमा फर्किएका छन्। उनका अनुसार ‘माग्ने राजा’ले अहिलेको युवापुस्ताको सामाजिक अवस्थालाई चित्रण गर्नेछ, जसमा आफूलाई नै ‘राजा’ ठान्ने प्रवृत्ति प्रस्तुत गरिनेछ।

आरम्भ प्रोडक्सनको ब्यानरमा निर्माण भएको यस सिनेमाका निर्माता मधुसुदन शर्मा हुन् भने प्रस्तुतकर्ता तथा सहनिर्माता मुनाल घिमिरे हुन्, जो दाङको घोराही उपमहानगरपालिका–४ का वर्तमान वडाध्यक्ष समेत हुन्।

सिनेमामा केदार र वर्षासँगै पुष्कर गुरुङ, शिशिर वाङ्देल, शारदा गिरी, टिकटकर मोडल मिस पबी (पवित्रा साकी) को अभिनय छ। विशेष भूमिकामा अभिनेता आर्यन सिग्देल पनि देखिने छन्।

सिनेमाको कथा, पटकथा तथा संवाद सामीप्य राज तिमल्सिनाले तयार पारेका हुन् भने संगीत दीपक शर्मा र बाबुल गिरीले दिएका छन्। सिनेमालाई RR Filmsले वितरण गर्नेछ।