Month: ४ महिना अगाडि

काठमाण्डौं, १० साउन – गणतन्त्र स्थापनाका लागि भएको ऐतिहासिक आन्दोलनको पृष्ठभूमिमा आधारित नयाँ नेपाली कथानक चलचित्र जनक्रान्ति निर्माण हुने भएको छ। चलचित्र रुद्राक्ष फिल्म्स प्रा.लि.को ब्यानरमा निर्माण गरिँदैछ भने निर्देशनको जिम्मेवारी उपेन्द्र तिमिल्सिनाले लिएका छन्।

शनिबार राजधानीमा आयोजित एक विशेष कार्यक्रममा गणतन्त्र नेपालका प्रथम प्रधानमन्त्री पुष्पकमल दाहाल ‘प्रचण्ड’ले चलचित्रको पहिलो पोस्टर सार्वजनिक गरे। सो अवसरमा बोल्दै प्रचण्डले जनक्रान्ति चलचित्रले नयाँ पुस्तालाई गणतन्त्र स्थापनाको संघर्ष र त्यसपछि आएको सामाजिक, आर्थिक तथा राजनीतिक रूपान्तरणको बारेमा बुझ्न सहयोग पुग्ने विश्वास व्यक्त गरे। उनले युवाहरुलाई हिजोको समाजको अवस्थाबारे जान्न अत्यन्त जरुरी रहेको बताए।

चलचित्रका निर्माता रुद्र प्रसाद खनालका अनुसार भाद्र दोस्रो साताबाट छायांकन सुरु हुने छ भने प्रदर्शन मिति फागुन १ गतेका लागि तय गरिएको छ। निर्देशक तिमिल्सिनाले चलचित्र विभिन्न आन्दोलनका ऐतिहासिक घटनामा आधारित रहेर तयार पारिने र यसले नयाँ पुस्तालाई नेपालको राजनीतिक इतिहास बुझ्न सहज बनाउने बताए।

सत्य घटनामा आधारित जनक्रान्तिको छायांकन देशका विभिन्न ऐतिहासिक र आन्दोलनप्रभावित स्थलहरूमा गरिनेछ। प्रमुख छायांकन स्थलहरूमा रुकुम, रोल्पा, जाजरकोट, जुम्ला, कालिकोट, बाँके, बर्दिया, धनकुटा, खोटाङ, भोजपुर तथा सर्लाही पर्छन्।

यो चलचित्रले नेपालमा गणतन्त्र स्थापनाको कथा मात्र नभई, संघर्ष, बलिदान र परिवर्तनको दस्तावेजका रूपमा पनि आफुलाई प्रस्तुत गर्ने अपेक्षा गरिएको छ।

काठमाडौं :-गाईजात्रा विशेष व्यंग्य ‘राष्ट्रिय चिडिया एयरबस’ युट्युबमा सार्वजनिक भएको छ। हास्य कलाकार दमन रुपाखेती र उत्तम अर्याल ‘कोदे’ को संयुक्त प्रस्तुति रहेको यो भिडियोले हास्य, व्यंग्य र सन्देशको गहिरो मिश्रणमार्फत दर्शकको मन जित्ने कोशिस गरेको छ।

निर्देशक दमन रुपाखेती भन्छन्,

“हामी हाँस्न बिर्सियौं, रिसाउन थाक्यौं, अब व्यंग्यकै सहारामा चेतना जगाउने बेला हो।”

भिडियोको सुरुआत देशको जटिल वर्तमान अवस्थाबाट हुन्छ — जहाँ नेताहरूको कर्तुत, जनताको प्रवृत्ति, र सुधारको आशा हास्यको माध्यमबाट चित्रण गरिएको छ।

‘राष्ट्रिय लुते पूजा’, ‘संसद छेउ’, ‘नेताको संकल्प’ जस्ता छोटा व्यंग्य दृश्यहरू समेटिएको भिडियोले दर्शकलाई हाँसाउँदै सोच्न बाध्य बनाउने उद्देश्य राखेको छ।

भिडियोमा दमन रुपाखेती, उत्तम ‘कोदे’, मिनु कुमाइ, दिलिप ढकाल, बल बहादुर घतानी, सुप्रिया हमाल, समिता रिजाल र दीपक रायमाझी लगायत कलाकारहरूको सशक्त अभिनय देख्न सकिन्छ।

कसले हेर्नुपर्छ?

जो देशको यथार्थप्रति चासो राख्छन्,

जो हास्न बिर्सिसकेका छन्,

र जो सोच्न पनि चाहन्छन्।

‘राष्ट्रिय चिडिया एयरबस’ मनोरञ्जन मात्रै होइन — यो सामाजिक व्यंग्यको थेरापी हो।

काठमाडौं, साउन ७। जनैपूर्णिमाको अवसर पारेर साउन २३ गतेदेखि देशभर प्रदर्शनमा आउने तयारीमा रहेको नेपाली चलचित्र ‘सिटामोल’ को ट्रेलर सार्वजनिक गरिएको छ। बुधबार सार्वजनिक गरिएको ३ मिनेट २० सेकेन्ड लामो ट्रेलरले समाजमा व्याप्त गरिबी, बेरोजगारी, सरकारी लापरवाही र पारिवारिक समस्यालाई हास्य र व्यङ्ग्यको माध्यमबाट प्रस्तुत गरेको छ।

ट्रेलरको आरम्भमा देखाइएका गाउँले परिवेश, पात्रहरूको व्यथा र जीवनका संघर्षहरूलाई हास्यरस र तिखो संवादमार्फत दर्शकसमक्ष प्रस्तुत गरिएको छ। प्रमुख कलाकार सौगात मल्ल र बेनिशा हमालको अभिनयले ट्रेलरलाई थप आकर्षक बनाएको छ। सौगातको सहज अभिनय शैली र बेनिशाको प्रस्तुतीले सामाजिक कथालाई मनोरञ्जनात्मक बनाएको देखिन्छ।

चलचित्रमा सामाजिक सन्देश बोकेको कथा प्रस्तुत गरिँदैछ, जसले दर्शकलाई हँसाउँदै सोच्न बाध्य बनाउने संकेत ट्रेलरमार्फत स्पष्ट भएको छ। निर्देशक राज बहादुर सानेले ग्रामीण समाजको यथार्थतामा आधारित हास्य शैलीमार्फत कथावस्तुलाई जिवन्त बनाएका छन्। सम्पादन, सिनेमाटोग्राफी र कलर ग्रेडिङले ग्रामीण जीवनशैलीको सौन्दर्य र समस्यालाई सशक्त ढंगले उतारेको छ।

‘सिटामोल’मा सौगात र बेनिशासहित श्रीकृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल तथा बालकलाकार करण नेपाली र आराध्या राज्यलक्ष्मी डिसीको अभिनय रहेको छ। श्रीकृष्ण र जानुकाले यसै चलचित्रबाट नेपाली रजतपटमा डेब्यु गरेका हुन्।

प्रदीप भण्डारी र निर्देशक सानेकै लेखन रहेको यो चलचित्र तुल्सी देवी फिल्म प्राली र जुनतारा फिल्मस्को सहकार्यमा निर्माण भएको हो। सिमोस सुनुवारको प्रस्तुती रहेको चलचित्रका निर्माता भुगोल कुमार कार्की र विकास राज जोशी हुन्। कार्यकारी निर्माताहरूमा अप्सरा नेपाली, अजय मल्ल र कुमार केसी छन् भने सह-निर्माता गंगाराम श्रेष्ठ छन्।

चलचित्रमा बाबुल गिरीको संगीत, कविराज गहतराजको कोरियोग्राफी, बन्दे प्रसादको सम्पादन, राजेन्द्र मोक्तानको कलर ग्रेडिङ, मुकेश शाहको साउण्ड डिजाइन, देव महर्जन र शंकर महर्जनको द्वन्द्व निर्देशन, राकेश दाहालको पोस्टर डिजाइन तथा दिव्य सुवेदीको छायांकन रहेको छ।

काठमाडौं,साउन ७:-नेपाली सिनेमा जगतका चर्चित अभिनेता अनुप विक्रम शाही र सफल निर्देशक मिलन चाम्सबीच पुनः सहकार्य हुने भएको छ। निर्देशक चाम्सको निर्देशनमा बन्न लागेको नयाँ प्रेमकथानक चलचित्र ‘सुम्निमा’ मा शाही अनुबन्धित भएका छन्। यो फिल्ममार्फत दुबैले चौथोपटक सहकार्य गर्न लागेका हुन्।

यसअघि शाही र चाम्सले ‘हँसिया’, ‘वीर विक्रम’ र ‘लिली बिली’ जस्ता चर्चित फिल्महरूमा सँगै काम गरिसकेका छन्। ‘लिली बिली’ पछि सात वर्षपछि उनीहरूबीच पुनः सहकार्य हुन लागेको हो। अभिनेता शाहीका अनुसार, ‘सुम्निमा’ मा उनले आफ्नो करिअरकै नयाँ र चुनौतीपूर्ण भूमिका निर्वाह गर्दैछन्, जसका लागि उनी हाल कडा तयारीमा जुटिरहेका छन्।

गोर्खा फिल्म्स र चाम्स इन्टरटेन्मेन्टको संयुक्त निर्माणमा बन्न लागेको ‘सुम्निमा’ को नामले नारीप्रधान लागे पनि चलचित्र भने विशुद्ध प्रेमकथा हुने निर्देशक चाम्सले स्पष्ट पारेका छन्। फिल्ममा प्रमुख अभिनेत्रीको भूमिकामा उपासना सिंह ठकुरी र अर्का अभिनेता कुन्साङ बमजन पहिल्यै अनुबन्धित भइसकेका छन्।

चलचित्रको कथा राजीव थापाले लेखेका हुन्। छायांकन आउँदो अगस्ट महिनाबाट लन्डन र नेपालका विभिन्न स्थानमा हुने जानकारी दिइएको छ। अन्य कलाकार तथा प्राविधिकहरूको चयन प्रक्रिया जारी रहेको निर्माण टिमले जनाएको छ।

हालै चाम्स निर्देशित बायोपिक फिल्म ‘अञ्जिला’ ले बक्स अफिसमा ब्लकबस्टर व्यापार गर्दै नेपाली बायोपिक विधामा अहिलेसम्मकै सबैभन्दा धेरै कमाइ गर्ने फिल्मको कीर्तिमान कायम गरेको छ। निर्देशक चाम्सले ‘सुम्निमा’ लाई पनि अन्तर्राष्ट्रिय बजारलाई लक्षित गर्दै उच्चस्तरीय प्रस्तुति दिने योजना रहेको बताए।

–अदृश्य संवाददाता | Adrisya Sanchar

काठमाडौं – हिन्दू नारीहरूले श्रद्धा, समर्पण र परिवारको दीर्घायुको कामनासहित मनाउने तीज पर्वको सन्दर्भमा निर्माण गरिएको सामाजिक यथार्थ झल्काउने भिडियो ‘घर झगडा ८’ सार्वजनिक भएको छ।

यज्ञ सापकोटा प्रस्तुत ‘घर झगडा ८’ लाई मदन खड्काले निर्देशन गरेका हुन्। तीज पर्वलाई धार्मिक, सांस्कृतिक र आस्थासँग जोडेर महिलाको संघर्ष, समर्पण र पारिवारिक उल्झनलाई समेटिएको यो भिडियोले समाजमा भइरहेको वास्तविकता उजागर गरेको छ।

भिडियोमा यज्ञ सापकोटा, शुशिला थापा, टंक डुम्रे, अनिता थापा, कुमार भारती, गीता‍ञ्जली योगी लगायत कलाकारहरूको अभिनय रहेको छ। बालकलाकारमा रसुना गौतम र आयुष गौतमले अभिनय गरेका छन्।

गीतमा यज्ञ सापकोटा, टिका सानु, उदयराज दुम्रे र सुमन थापाको स्वर रहेको छ भने शिव हमालको शब्द रचना तथा यज्ञ सापकोटाको संगीत रहेको छ। एरेन्ज याम थापाको रहेको छ।भिडियोलाई टकं के सी ले छायांकन गरेका हुन् भने सम्पादन रोजित महर्जनको रहेको छ।

‘घर झगडा ८’ लाई अकला देवी म्युजिक प्रा.लि. मार्फत युट्युब च्यानल Yagya Sapkota मा सार्वजनिक गरिएको छ। भिडियोले तीज जस्तो पवित्र पर्वको माध्यमबाट सामाजिक विकृति, पारिवारिक कलह र नारी पीडालाई कलात्मक ढंगले प्रस्तुत गरेको छ।

भिडियोमा देखाइएका विषयहरू आजको समाजमा घटिरहेका वास्तविकता हुन्। निर्देशक मदन खड्काले तीजको मूल भावना भुलिंदै गएको वर्तमान समाजमा महिलाको अधिकार, पीडा र संघर्षलाई उजागर गर्न खोजेका छन्।

पक्कै पनि यो भिडियोले दर्शकको मन छुने विश्वास लिइएको छ।

© Adrisya Sanchar

काठमाडौं, भदौ – निर्देशक खिल बहादुर गुरुङको निर्देशनमा निर्माण भएको नेपाली सिनेमा ‘रिमै’ को टिजर सार्वजनिक गरिएको छ। करिब २ मिनेटको यो टिजरले एक रहस्यमय, रोमाञ्चक र भावनात्मक कथा झल्काउँछ। टिजरसँगै निर्माण टिमले सिनेमाको प्रदर्शन मिति पनि एक हप्ता अघि सारेको छ।

पहिला भदौ २७ गते प्रदर्शन हुने भनिएको सिनेमा अब भदौ २० गते बाट देशव्यापी रूपमा रिलिज हुने भएको हो।

दयाहाङ राई, रिश्मा गुरुङ, अर्पण थापा, र बुद्धि तामाङ लगायतका कलाकारको दमदार उपस्थितिले टिजरमा गहिरो प्रभाव छोडेको छ। ग्रामीण परिवेश, प्रेम, पीडा, संस्कार र बदला मिसिएको कथाले दर्शकमा कौतुहलता जगाएको छ।

टिजरको अन्त्यतिर देखिएको तनावपूर्ण दृश्यले सिनेमामा द्वन्द्व र रहस्यको पाटो पनि प्रमुख हुने संकेत गरेको छ। गुरुङ संस्कार र संस्कृतिलाई विशेष स्थान दिइएको टिजरले फिल्मप्रति दर्शकमाझ उत्साह बढाएको छ।

कलाकार र निर्माण टिम:

गौमाया गुरुङ, कविता आले मगर, माओत्से गुरुङ, पुस्कर गुरुङ, वीरमाया गुरुङ, वीरबल घले, डिवी गुरुङ, टेक गुरुङ, बाल कलाकार असिम सुब्बा, प्रेस्टु गुरुङ र प्रश्ना राना मगरले अभिनय गरेका छन्।

सिनेमा गोरखा सिरानचोक एण्ड लिगलिगकोट फिल्म्स् प्रा.लि. को प्रस्तुति र रोटेपिङ इन्टरटेनमेन्ट को सहकार्यमा निर्माण गरिएको हो। उपेन्द्र सुब्बाको लेखन, शैलेन्द्र ध्वज कार्कीको छायांकन, दीपक शर्मा र थानेश्वर गौतमको संगीत, मित्र डी. गुरुङको सम्पादन रहेको छ।

निर्मातामा टिका गुरुङ, जित यात्री गुरुङ, दुन बहादुर घले, सह-निर्मातामा बिनु गुरुङ, रोशन भट्टराई, राजेश घिमिरे, कार्यकारी निर्मातामा वीरबल घले रहेका छन्।