काठमाडौं:-निर्देशक र निर्माता ज्ञानेन्द्र देउजाबाट बनिरहेको चर्चित नेपाली फिल्म ‘झिँगेदाउ २’ को नयाँ गीत ‘आजलाई नाई नभन’ बुधबार रेकर्ड गरिएको छ। पछिल्लो समयका लोकप्रिय गायिका शान्तिश्री परियार र गायक बसन्त थापा को आवाजमा सजिएको यो गीतमा संगीतकार अर्जुन पोखरेल ले शब्द, संगीत र एरेन्जको भूमिका सम्हालेका छन्।
शान्तिश्री परियार र अर्जुन पोखरेलले योभन्दा पहिले पहिलो भागको हिट गीत ‘आगो बिना बिँडी जल्दैन’ मा सँगै काम गरिसकेका थिए। ‘झिँगेदाउ २’ का निर्देशक देउजाले यस सफल सहकार्यलाई ‘लक्कि चार्म’ मान्दै पुनः गीतमा शान्तिश्री परियारलाई आमन्त्रण गरेको जानकारी दिएका छन्।
बसन्त थापाका लागि यो पार्श्व गायनमा ‘छ माया छपक्कै’ पछि दोस्रो अनुभव हो। “झिँगेदाउ २ को म्युजिक टीमसँग काम गर्न पाउँदा निकै उत्साहित छु,” भन्छन थापा।
निर्माण टिमका अनुसार यस गीतसहित सम्पूर्ण प्रि–प्रोडक्सन काम आगामी १० दिनभित्रै पूरा हुनेछ। दशैं–तिहारको उत्सवपछि छायांकन सुरु गर्ने तयारी रहेको छ।
फिल्मले पहिलो भागको अन्त्य बिन्दुबाटै कथा सुरू गर्ने भएकाले पूर्ण रूपमा सिक्वेलको रुपाकँन गरिएको छ। मुख्य भूमिकामा केकी अधिकारी, आँचल शर्मा, मुकुन भुषाल, कुशल विष्ट लगायतका पुराना कलाकारहरू फिर्ता देखिन्छन्। त्यस्तै, एक अभिनेता र एक अभिनेत्री नयाँ अनुहारले भरिनेछन्।
‘झिँगेदाउ २’ कपनगढी सिनेमा प्रालि अन्तर्गत शुलभ प्रतिक देउजा र समीक्षा देउजा यादवले निर्माता र सह–निर्माताको जिम्मेवारी निभाउँदैछन्। ईश्वर घिमिरे उत्पादन प्रमुख, बिष्णु कल्पित छायांकन निर्देशक, अर्जुन पोखरेल संगीत निर्देशक, रोशन श्रेष्ठ द्वन्द्व निर्देशक, र मित्र डी गुरुङ सम्पादक रहेका छन्।
