काठमाडौँ । हास्य कलाकार अर्जुन घिमिरे (पाँडे) को डेब्यु निर्देशनमा निर्माण भइरहेको सिनेमा ‘झरीपछिको इन्द्रिणी’को पोस्टर सार्वजनिक गरिएको छ। आइतबार सार्वजनिक पोस्टरमा फिल्मका प्रायः सबै कलाकारलाई उनी–उनीकै क्यारेक्टर लुक्समा प्रस्तुत गरिएको छ।

नागराज इन्टरटेन्मेन्ट प्रालिले निर्माण गरेको यस सिनेमाबाट अभिनेता गणेश उप्रेती लामो समयपछि नेपाली पर्दामा कमब्याक गर्दैछन्। छायांकनका लागि उनी अमेरिकाबाट नेपाल फर्किएका थिए। फिल्ममा गणेश उप्रेतीसँगै रमेश उप्रेती, प्रकाश घिमिरे, दीपाश्री निरौला, सरिता गिरी, देशभक्त खनाल, निर्मल शर्मा, कृष्ण शिवाकोटी, कृष्णभक्त महर्जन, अर्जुन घिमिरे (पाँडे), प्रियना आचार्य (मुन्नी), अंशु महर्जन, राजेन्द्र नेपाली र लक्षणा राईको अभिनय छ।

यसैमार्फत कलाकार विमोचन दवाडी र जेसिका पोखरेलले डेब्यु गर्दै छन्। त्यस्तै, बाल कलाकार दिप्सन चिलवाल पनि महत्वपूर्ण भूमिकामा देखिँदै छन्। एक गीतमा मोडल अञ्जली अधिकारी र कोरियोग्राफर प्रदीप लामा विशेष उपस्थितिमा देखिनेछन्।

निर्देशक घिमिरे स्वयंले कथा लेखेका छन् भने पटकथा तथा संवाद गणेश कार्की र विशाल घिमिरेले तयार पारेका हुन्। फिल्मका छायांकन निर्देशक बुद्ध थापा हुन्।
फिल्मकी निर्मात्री अनिशा सेन्दाङ लिम्बु हुन्। अनु थापा, पंकज खड्का, सिर्जना खड्का, सुवास शर्मा र राम कार्की सह-निर्मातामा छन्। लाइन प्रोड्युसरको भूमिकामा योगेश खतिवडा र विनोद कँडेल रहेका छन्।