हामी प्रायः चलचित्रमा देखिने कलाकारहरूलाई मात्रै चिन्छौँ, तिनीहरूको संघर्ष सुन्छौँ।
तर पर्दा पछाडि रहने ती हातहरू जसले एउटा दृश्यलाई जादुजस्तो देखिन्छ बनाउँछन् — तिनको कथा भने प्रायः अनसुनी रहन्छ।
निर्देशकदेखि लिएर टेक्निसियन, मेकअप आर्टिस्टदेखि क्यामेरा असिस्टेन्टसम्म — हिरोलाई ‘हिरा’ बनाउनेमा उनीहरूको हात बराबरको हुन्छ।

आजको अंकमा हामी त्यही पर्दापछाडिका एक प्रेरणादायी व्यक्तित्व — कृष्णबहादुर थापा — का कुरा गर्दैछौँ, जसले अस्ट्रेलियाको रङ्गीन जीवन त्यागेर आफ्नै देशमा सम्भावनाको नयाँ कथा लेखिरहेका छन्।

क्यामेराको क्लिकबाट कथा जन्माउने मानिस

“क्यामेराको प्रत्येक क्लिकले कथा जन्माउँछ, दृश्यले आत्मा बोलाउँछ।”
यी शब्दहरूलाई आफ्नो कामबाट साकार पार्दै आएका कृष्णबहादुर थापाको यात्रा संघर्ष र आत्मविश्वासले भरिएको छ।
लमजुङको बेसिसहरबाट यात्रा सुरु गरेका उनले १५ वर्षअघि काठमाडौँ आएर अस्लेसा फिल्म्स मा क्यामेरा टेकरको रूपमा आफ्नो सिनेमाजगतको बाटो सुरु गरे।
त्यो समय उनले लाइट र क्यामेराको आधारभूत ज्ञान सिक्दै अघि बढे।
तर उनको सपना मात्र ‘क्यामेरा टेकर’ बन्ने होइन, एकदिन नेपालकै अग्रणी Director of Photography (DOP) बन्ने थियो।

शून्यबाट सुरु भएको यात्रा

क्यामेरा टेकरदेखि सिनेमाटोग्राफरसम्मको यात्रामा उनले नेपाली, भारतीय र अमेरिकी छायाङ्कारहरूसँग काम गर्ने अवसर पाए।
उनीहरूबाट सिकेका सीप, दृष्टिकोण र कार्यशैलीलाई आत्मसात गर्दै उनले आफ्नो काममा निरन्तर सुधार ल्याइरहे।

काममा समर्पण, क्रु सदस्यप्रतिको सद्भावपूर्ण व्यवहार र विनम्रता — यी गुणहरूले नै उनलाई आज नेपालको प्रतिष्ठित फिल्म निर्माण कम्पनीहरूसँग जोडिदिएका छन्।
आज उनी त्यही कम्पनीका स्थायी र विश्वसनीय DOP मध्ये एकका रूपमा स्थापित छन्।
‘हुक्का’ बाट प्रारम्भ भएको सिनेमाटोग्राफीको अध्याय

करियरको दसौं वर्षमा उनले पहिलोपटक सन्तोष कुमार आत्रे को कथा र शम्भु थापाको निर्देशनमा बनेको चलचित्र ‘हुक्का’ (2022) बाट मुख्य सिनेमाटोग्राफरको रूपमा आफूलाई प्रमाणित गरे।
त्यसपछि उनले पछाडि फर्केर हेर्नु परेन।

केही उल्लेखनीय कामहरू:

घर (2019) – AC

परस्त्री (2022) – AC

के घर के डेरा (2023) – Chief AC

भस्मे डन (2025) – Chief AC

प्रेमा (2023) – Cinematographer

के घर के डेरा: घर नम्बर २ – Cinematographer

ह्रस्व दिर्घ – Cinematographer

हरिबहादुरको जुत्ता – Cinematographer

मेयर सा’ब (Pending) – Cinematographer

हन्टर (Shooting) -Cinematographer
अस्ट्रेलिया छोडेर आफ्नै माटोमा फर्किने निर्णय

‘भस्मे डन’ पछि केही समयका लागि उनी अस्ट्रेलिया पुगे।
तर त्यहाँको आरामदायी जीवनले उनलाई रोक्न सकेन।
“यदि मैले नेपालमै संघर्ष गरेर केही गर्न सकेँ भने, यहीं अनगिन्ती अवसर छन्,” भन्ने सोचका साथ उनले देश फर्कने निर्णय गरे।

फर्किएपछि छोटो समयमै उनले चारवटा चलचित्रको छायांकन पूरा गरे — जसले उनको समर्पण र पेशाप्रतिको प्रतिबद्धता प्रष्ट देखाउँछ।

अवार्ड र संस्थागत संलग्नता:-

कृष्णबहादुर थापा पछिल्ला वर्षहरूमा National Inclusive Music Awards 2023 र Kids Model of the Year 2022 मा जुरी सदस्यको रूपमा संलग्न भइसकेका छन्।
त्यसैगरी उनी हाल NEFTA (Nepal Film Technicians Association) का कोषाध्यक्ष पनि हुन्।

अब्बल DOP बाट ब्रान्ड बन्ने यात्रातिर

हालै उनले छायांकन गरेको चलचित्र ‘हरिबहादुरको जुत्ता’ प्रदर्शनमा आएको छ र दर्शकबाट राम्रा प्रतिक्रिया पाइरहेको छ।
उनको व्यावसायिकता, विनम्रता र दृष्टिकोणले उनलाई दर्शक र सहकर्मीबीच ‘विश्वसनीय नाम’ बनाएको छ।

विश्वास गर्न सकिन्छ — एकदिन कृष्णबहादुर थापा केवल एउटा नाम होइन,
नेपाली सिनेमाको ब्रान्ड बन्नेछन्।