काठमाडौं।
निर्देशक मिलन चाम्सको निर्देशनमा निर्माण हुन लागेको प्रेमकथानक चलचित्र ‘सुम्निमा’ मा नयाँ अनुहारको रूपमा अनिकेत पाख्रिन लामा अनुबन्धित भएका छन्। उनले अडिसन प्रक्रिया पार गर्दै यो फिल्ममा स्थान बनाएका हुन्।

अनिकेत पाख्रिन लामा भारतीय चर्चित रियालिटी शो ‘स्प्लिट्सभिल्ला’ को १४औं सिजनका प्रतिस्पर्धी थिए, जहाँ उनी उत्कृष्ठ आठ प्रतिस्पर्धीमा पर्न सफल भएका थिए। नेपाली मुलका अनिकेतको आत्मविश्वास, व्यक्तित्व र क्यामेरा अघि प्रस्तुत हुने शैलीले निर्माण टिमलाई प्रभावित पारेको निर्देशक चाम्सले जानकारी दिएका छन्।

अनिकेतले यस चलचित्रमार्फत नेपाली फिल्म उद्योगमा डेब्यू गर्न लागेका हुन्। निर्देशक चाम्सका अनुसार, ‘सुम्निमा’ विशुद्ध प्रेम कथामा आधारित फिल्म हो। यद्यपि नामले नारीप्रधान कथा जस्तो लागे पनि, फिल्म प्रेम, द्वन्द्व र सांस्कृतिक पृष्ठभूमिमा केन्द्रित हुनेछ।

चलचित्रको लेखन राजीव थापाले गरेका हुन् भने छायांकन आउँदो अगस्टदेखि लन्डन र नेपालमा सुरु हुने तयारीमा छ। फिल्म गोर्खा फिल्म्स र चाम्स इन्टरटेन्मेन्टको सह-निर्माणमा बन्नेछ।

यसअघि नै उपासना सिंह ठकुरी, कुन्साङ बमजन र अनुप विक्रम शाही चलचित्रमा अनुबन्ध भइसकेका छन्। बाँकी कलाकार तथा प्राविधिक टिमको छनोट प्रक्रिया पनि क्रमशः जारी रहेको जनाइएको छ।

निर्देशक मिलन चाम्सको पछिल्लो बायोपिक फिल्म ‘अञ्जिला’ ले बक्स अफिसमा उल्लेखनीय सफलता हात पार्दै नेपाली बायोपिक विधामा नयाँ कीर्तिमान राखेको थियो। त्यसैले ‘सुम्निमा’ लाई पनि अन्तर्राष्ट्रिय दर्शक लक्षित गरी निर्माण गर्न लागिएको चाम्सको भनाइ छ।