काठमाडौं –
नेपाली चलचित्र ‘परालको आगो’बाट कलाकार जितु नेपाल बाहिरिएको पुष्टि भएको छ। केही महिनाअघि निर्माण टिमसँग सहमति जनाएका जितुले अन्ततः फिल्म छोडेका हुन्।

निकट स्रोतका अनुसार, कथा र टिम चयनबारे केही विषयमा मत बाझिएको थियो। जितुले कथावस्तुमा सुझाव दिन खोजेका थिए भने निर्माणपक्षले आफ्नै योजना अनुसार अगाडि बढ्न चाहेको बुझिएको छ।

फिल्मको छायांकन दशैंको फूलपाती अगाडि सुरु गर्ने तयारी छ, तर जितुले त्यतिबेलाको डेट उपलब्ध नभएको जनाएपछि थप असमझदारी चुलिएको बताइएको छ।

निर्माण टिम अहिले जितुले पाउने भूमिका नयाँ कलाकारलाई दिने तयारीमा जुटेको छ। सुशील पोखरेलको निर्माण, लक्ष्मण सुनारको निर्देशन रहने फिल्ममा अभिनेता प्रकाश सपुत र अभिनेत्री सुहाना थापा मुख्य भूमिकामा छन्।

पहिले दशैंको फूलपातीमा रिलिज गर्ने भनिएको फिल्मको प्रदर्शन मिति हाललाई स्थगित गरिएको छ। तर, यही वर्षभित्र फिल्म प्रदर्शन गर्ने लक्ष्य भने कायमै रहेको निर्माण पक्षले जनाएको छ।