काठमाडौं : नेपालमा पछिल्लो समय बहुभाषिक चलचित्र निर्माणले गति लिइरहेको छ। नेपालीसँगै नेवारी, मैथिली, भोजपुरी, तामाङ, गुरुङ, थारु लगायत विभिन्न मातृभाषामा चलचित्र बन्न थालेसँगै देशको सांस्कृतिक विविधता अझ बलियो बन्दै गएको देखिन्छ। यही सन्दर्भमा नयाँ नेवारी चलचित्र ‘अ:मै’ निर्माणको औपचारिक घोषणा गर्दै यसको पहिलो पोस्टर सार्वजनिक गरिएको छ।
ह्वाइट स्ट्रिङको प्रस्तुति रहेको चलचित्र ‘अ:मै’ को सार्वजनिक पोस्टरले नेवारी समुदाय तथा सिनेप्रेमी दर्शकको ध्यान तानेको छ। निर्माण पक्षका अनुसार यो चलचित्र एक सत्य घटनाबाट प्रेरित कथा हो, जसलाई पौराणिक प्रेमकथासँग जोडेर प्रस्तुत गरिनेछ। चलचित्रमा परम्परा, संस्कृति, प्रेम र मानवीय संवेदनालाई केन्द्रमा राखिने जनाइएको छ।
चलचित्रको लेखन तथा निर्देशन देविन महर्जन ले गर्नेछन्। मौलिक कथावस्तु र फरक सोचका लागि परिचित देविनबाट नेवारी सिनेमामा नयाँ प्रयोग देख्न पाइने अपेक्षा गरिएको छ। चलचित्रका क्रिएटिभ हेड अभय राज बराल रहेका छन् भने छायांकन निर्देशन (डिओपी) को जिम्मेवारी बसन्त महर्जन ले सम्हाल्नेछन्।
निर्माण टिमका अनुसार चलचित्रका लागि केही कलाकारहरू छनोट भइसकेका छन् भने अन्य मुख्य तथा सह–कलाकारको खोजी प्रक्रिया जारी छ। नेवारी भाषा, संस्कृति र भावनालाई नजिकबाट बुझ्ने कलाकारलाई प्राथमिकतामा राखेर कास्टिङ गरिँदैछ।
चलचित्रको प्रमुख भूमिकामा प्रदीप महर्जन र श्रिया महर्जन देखिनेछन्। संगीततर्फ पनि प्रदीप महर्जन र एडवार्डिनको संयोजन रहने निर्माण टिमले जनाएको छ।
नेवारी भाषामा निर्माण हुने चलचित्रको संख्या बढिरहेको वर्तमान समयमा ‘अ:मै’ ले भाषा, संस्कृति र पहिचानको संरक्षण गर्दै नयाँ पुस्तासम्म मौलिक कथा पुर्‍याउने विश्वास गरिएको छ। सत्य घटनाबाट प्रेरित पौराणिक प्रेमकथालाई आधुनिक सिनेमाटिक शैलीमा प्रस्तुत गर्ने प्रयासले चलचित्रलाई फरक र अर्थपूर्ण बनाउने निर्माण पक्षको दाबी छ।
पहिलो पोस्टर सार्वजनिक भएसँगै चर्चामा आएको चलचित्र ‘अ:मै’ हाल निर्माणको आगामी चरणतर्फ अघि बढिरहेको छ। दर्शकले निकट भविष्यमा यस चलचित्रमार्फत नेवारी सिनेमाको फरक स्वाद अनुभव गर्न पाउने अपेक्षा गरिएको छ।