काठमाडौँ — लेखक रुपक अधिकारीद्वारा लिखित चर्चित कृति ‘साढे ३ हत्या’ को दोस्रो संस्करण आउँदो कात्तिक ३० गते आइतबारदेखि देशभरका पुस्तक पसलमा उपलब्ध हुने भएको छ। प्रकाशक न्युरोड बुक्सका अनुसार पहिलो संस्करणले पाएको सकारात्मक प्रतिक्रिया र बढ्दो मागका कारण उपन्यास पुनः मुद्रण गरिएको हो।

उपन्यासले जीवनका उतार–चढाव, प्रेम र वियोग, आत्मस्वीकृति, मनोवैज्ञानिक संघर्ष र मानिसले भोग्नुपर्ने आन्तरिक पीडालाई कलात्मक रूपमा प्रस्तुत गर्छ।

यस कृतिमा लेखक रुपक अधिकारीले उठाएको ‘जिन्दगी काँडा कि फूल ?’ भन्ने गहिरो दार्शनिक प्रश्नले पाठकहरूलाई जीवनप्रतिको दृष्टिकोण पुनर्विचार गर्न प्रेरित गर्ने प्रकाशकले जनाएको छ। अधिकारीको संदेश छ —
“जिन्दगी सुन्दर छ; काँडा र फूल दुवैसँगै बाँच्न सकिँदा मात्रै यसको वास्तविक अर्थ पहिल्याउनु सम्भव छ।”

प्रकृति, प्रेम र सम्बन्धबारे उनका विशिष्ट दृष्टिकोण तथा जीवनको कठोरताभित्र लुकेका सुन्दरता खोज्ने शैली उपन्यासको मुख्य आकर्षण भएको समीक्षकहरूको भनाइ छ। पुस्तक मनोरञ्जनसँगै आत्ममन्थन र जीवनबोध दिलाउने कृति का रूपमा चिनिँदै गएको छ।

प्रकाशन संस्थाका अनुसार, “यो पुस्तक मात्र होइन, धेरै पाठकका लागि जीवनको एउटा अंश बन्न सक्छ। कहिलेकाहीँ मृत्युले पनि प्रेम र आत्मसमर्पणको अर्थ सिकाउँछ भन्ने लेखकका अभिव्यक्तिहरू विशेष छन्।”