काठमाडौं । सनिशा भट्टराई र आशिर्वाद क्षेत्री अभिनित नयाँ गीत ‘भो नबोलाउ मलाई’ को भिडियो सार्वजनिक गरिएको छ। शनिबार काठमाडौंमा आयोजित एक विशेष समारोहका बीच वरिष्ठ कलाकार मदनकृष्ण श्रेष्ठको प्रमुख आतिथ्यतामा भिडियो रिलिज गरिएको हो।

भिडियो सार्वजनिक गर्दै मदनकृष्ण श्रेष्ठले गीत निकै मन पराएको उल्लेख गर्दै गायक तथा संगीतकार सफल शेरचनको स्वर, शब्द र संगीतको प्रशंसा गरे। उनले यो गीत श्रोता तथा दर्शकबीच लोकप्रिय हुनेमा विश्वास व्यक्त गर्दै निर्माण टिमलाई बधाईसमेत दिए।

गीतलाई चर्चित एरेञ्जर बाबुल गिरीले एरेञ्ज गरेका छन्। निर्देशन दिपा शाक्य श्रेष्ठको रहेको भिडियोलाई रंग संयोजन प्रकाश मानन्धरले गरेका छन् भने छायांकन उत्तम हुमागाईंले गरेका हुन्। मिक्सिङ/मास्टरिङ राजेश शाहले गरेका यस गीतमा मेकअप डिपा पौडेलको रहेको छ भने प्रोडक्सन म्यानेजर दिपेन गौतम ‘माइकल’ हुन्।

कार्यक्रममा अभिनेत्री सनिशा भट्टराईले सह-अभिनेता आशिर्वाद क्षेत्रीको अभिनय र व्यक्तित्वको तारिफ गर्दै भविष्यमा समेत उनलाई साथमा लिएर काम गर्न चाहेको बताइन्।

भिडियोमा सनिशा र आशिर्वादको आकर्षक केमेस्ट्री देख्न सकिन्छ। गीतलाई निर्माण पक्षले चाँडै स्पोटिफाइ, टिकटक, रिसो, एप्पल म्युजिक, जिओ सावन र अमेजन प्राइम म्युजिकमा पनि रिलिज गर्ने जनाएको छ।

एसएस प्रोडक्सन लण्डनको आधिकारिक युट्युब च्यानलमार्फत सार्वजनिक गरिएको यो गीतलाई एसएस प्रोडक्सन लण्डनले नै निर्माण गरेको हो।