काठमाडौ :-ऋषि लामिछानेको निर्देशनमा निर्माण भएको नेपाली चलचित्र ‘माग्ने राजा’ को ट्रेलर सार्वजनिक गरिएको छ। बिहीबार राजधानीमा आयोजित एक विशेष कार्यक्रममा ३ मिनेट ४० सेकेण्ड लामो ट्रेलर सार्वजनिक गरिएको हो।

ट्रेलरमा मुख्य अभिनेता केदार घिमिरे ‘माग्ने बुढा’ लाई केन्द्रमा राखिएको छ। हास्यकलाकारको पहिचान बनाएका घिमिरे यस चलचित्रमार्फत् पहिलोपटक शीर्ष भूमिकामा देखिएका हुन्। ट्रेलरले मुलुकको सामाजिक, आर्थिक र राजनीतिक यथार्थलाई व्यङ्ग्यात्मक शैलीमा प्रस्तुत गरेको छ।

ट्रेलरमार्फत् एक सामान्य गाउँले युवकको धनी बन्ने सपना, त्यसको संघर्ष, र व्यावसायिक लोभका बीचको द्वन्द्व देखाइएको छ। केदारसँगै चलचित्रमा वर्षा सिवाकोटी, विल्सन विक्रम राई, शिशिर बाङ्देल, शारदा गिरी, मिस पबी, र गायिका तथा पूर्व राष्ट्रिय सभा सदस्य कोमल वली को समेत विशेष भूमिकामा अभिनय रहेको छ। अभिनेत्री वलीलाई चलचित्रमा न्यायाधीशको भूमिकामा देख्न सकिन्छ।

चलचित्रमा अभिनेता आर्यन सिग्देलको पनि विशेष उपस्थितिको संकेत ट्रेलरमै दिइएको छ। सिनेमाको कथा, पटकथा र संवाद सामीप्य राज तिमल्सेनाले लेखेका हुन् भने दीपक शर्मा र बाबुल गिरीको संगीत रहेको छ। छायांकन नरेन्द्र मैनालीले गरेका हुन्।

‘माग्ने राजा’ आगामी भदौ ६ गतेबाट देशभर रिलिज हुने तयारीमा छ।
चलचित्रले ‘बिना मिहिनेत पैसा कमाउन खोज्दा कस्तो परिणाम आउन सक्छ’ भन्ने यथार्थलाई हास्यव्यङ्ग्य शैलीमा उजागर गर्ने लक्ष्य राखेको छ।

आरम्भ प्रोडक्सनको ब्यानरमा निर्माण भएको सिनेमाका प्रस्तुतकर्ता तथा निर्माता मुनाल घिमिरे हुन्। उनी हाल दाङको घोराही उपमहानगरपालिका–४ का वडा अध्यक्ष समेत हुन्।
चलचित्रको वितरण अधिकार RR Films ले लिएको छ।