काठमाडौं, साउन २० – आगामी शुक्रबार अर्थात् साउन २३ गतेदेखि प्रदर्शनमा आउन लागेको बहुप्रतिक्षित नेपाली सिनेमा ‘सिटामोल’ को नयाँ गीत ‘रातो पछ्यौरी’ सार्वजनिक गरिएको छ। प्रचार-प्रसारमा आक्रामक शैली अपनाइरहेको निर्माण टिमले सिनेमाको भावनात्मक पक्ष उजागर गर्ने लक्ष्यसहित यस गीतलाई सार्वजनिक गरेको हो।

गीतमा अञ्जना खतिवडा र रवि ओडको सुमधुर स्वर सुन्न सकिन्छ भने बाबुल गिरीले गीतको शब्द, संगीत तथा एरेञ्ज गरेका छन्। नेपाली मौलिकता झल्काउने लय र भावले सजिएको यस गीतलाई दर्शकले सामाजिक सन्देश र भावुकताको संयोजनका रूपमा लिएको प्रतिक्रिया दिइरहेका छन्।

यसअघि सार्वजनिक गरिएको सिनेमाको ट्रेलरले समेत राम्रो चर्चा पाएको थियो। ट्रेलरमा नेपाली समाजमा व्याप्त गरिबी, बेरोजगारी, पारिवारिक तनाव, तथा सरकारी उदासिनतालाई हास्य व्यङ्ग्य शैलीमा चित्रण गरिएको छ, जसले दर्शकको मन जित्न सफल भएको देखिन्छ।

राज बहादुर साने निर्देशित ‘सिटामोल’ मा सौगात मल्ल, बेनिशा हमाल, श्रीकृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल, तथा बालकलाकार करण नेपाली र आराध्या राज्यलक्ष्मी डिसीको अभिनय रहेको छ। श्रीकृष्ण र जानुकाले यसै फिल्मबाट नेपाली सिने जगतमा डेब्यु गरेका हुन्।

सिनेमा तुल्सी देवी फिल्म प्रालीले जुनतारा फिल्मस्को सहकार्यमा निर्माण गरेको हो। कथा प्रदीप भण्डारी र निर्देशक सानेले लेखेका हुन् भने प्रस्तुति सिमोस सुनुवारको रहेको छ।

फिल्मका निर्माता भुगोल कुमार कार्की र विकास राज जोशी, कार्यकारी निर्माता अप्सरा नेपाली, अजय मल्ल र कुमार केसी, तथा सह-निर्माता गंगाराम श्रेष्ठ रहेका छन्।

प्राविधिक पक्षमा बाबुल गिरीको संगीत, कविराज गहतराजको कोरियोग्राफी, बन्दे प्रसादको सम्पादन, राजेन्द्र मोक्तानको डिआई कलर, मुकेश शाहको साउण्ड डिजाइन, देव महर्जन र शंकर महर्जनको द्वन्द्व निर्देशन, राकेश दाहालको पोस्टर डिजाइन, तथा छायांकन दिव्य सुवेदीले गरेका छन्।