काठमाडौं – आगामी साउन २३ गतेदेखि देशभर प्रदर्शनमा आउन लागेको बहुप्रतिक्षित नेपाली सिनेमा ‘सिटामोल’ अहिले प्रचारको चरम चरणमा पुगेको छ। चलचित्र टिम पछिल्लो समय कमेडी नाइट विद च्याम्पियन मा सहभागी भइसकेको छ भने विभिन्न टेलिभिजन, रेडियो, अनलाइन र डिजिटल मञ्चहरूमा पुग्दै देशभरका दर्शकहरूसँग प्रत्यक्ष संवाद गरिरहेको छ।

सिनेमाका टिजर र ‘झुम्का कानैमा’ बोलको गीत युट्युबमा सार्वजनिक भएसँगै अत्यधिक चर्चा बटुल्न सफल भएका छन्। दुबै सामाग्रीले युट्युबमा १० लाखभन्दा बढी भ्यूज प्राप्त गर्दै दर्शकमाझ उच्च हाइप बनाएको देखिएको छ।

विशेषगरी टिजरमा देखिएको अभिनेता सौगात मल्ल र अभिनेत्री बेनिशा हमाल को केमेस्ट्रीलाई दर्शकहरूले अत्यन्तै रुचाएका छन्। ‘झ्यानाकुटी’ पछि पुनः यो जोडीलाई पर्दामा देख्न पाउँदा दर्शकहरू उत्साहित देखिएका छन्।

प्रचार सामाग्रीको सफलता, अबको जिम्मेवारी दोब्बर

सिनेमाका निर्देशक राज बहादुर साने भन्छन्, “गीत र टिजरबाट दर्शकले जुन प्रतिक्रिया दिनुभयो, त्यसले अब आउन लागेका ट्रेलर र गीतलाई अझ परिस्कृत र सशक्त बनाउन चुनौती थपिएको छ।”

निर्माता भूगोल कार्की र विकासराज जोशी ले पनि दर्शकको प्रतिक्रिया प्रति कृतज्ञता व्यक्त गर्दै अबको प्रचार सामग्रीले अझै उच्च स्तरको प्रभाव पार्ने विश्वास व्यक्त गरेका छन्।

कथा, पात्र र सामाजिक बिम्ब

‘सिटामोल’ सिनेमा केवल मनोरञ्जनका लागि नभई नेपालको सामाजिक यथार्थ र जरो गाडेका कुसंस्कारहरू माथि चोट पुर्‍याउने प्रयासको रूपमा निर्माण गरिएको निर्देशक तथा निर्माण टिमको भनाइ छ।

चलचित्रमा सौगात र बेनिशासँगै श्री कृष्ण निरौला, जानुका विश्वकर्मा, लोकेन्द्र लेखक, हिउँवाला गौतम, सुशील पोखरेल, दिनेश रेग्मी, आरआर खड्का, ग्यानु मल्ल, काजल भुजेल, पवन भट्टराई, करण नेपाली, आराध्या राज्यलक्ष्मी डिसी लगायतको सशक्त अभिनय रहनेछ।

श्री कृष्ण निरौला र जानुका विश्वकर्मा यसै चलचित्रबाट नेपाली सिनेमा क्षेत्रमा डेब्यु गर्दैछन्।

सशक्त निर्माण टिम र प्राविधिक पक्ष

तुल्सी देवी फिल्म प्राली र जुनतारा फिल्मस्को सहकार्यमा निर्माण भएको यो सिनेमा सिमोस सुनुवारको प्रस्तुति हो।
निर्माण टिममा भूगोल कुमार कार्की र विकासराज जोशी निर्माता छन् भने अप्सरा नेपाली, अजय मल्ल, कुमार केसी कार्यकारी निर्माता छन्। गंगाराम श्रेष्ठ सह-निर्माताको भूमिकामा छन्।

सिनेमाको कथालेखक प्रदीप भारद्वाज र निर्देशक साने स्वयं हुन्।
संगीतकार बाबुल गिरी, कोरियोग्राफर कविराज गहतराज, सम्पादन बन्दे प्रसाद, कलर राजेन्द्र मोक्तान, साउन्ड डिजाइन मुकेश शाह, पोस्टर डिजाइन राकेश दाहाल, द्वन्द्व निर्देशन देव महर्जन र शंकर महर्जन रहेका छन्। सिनेमाको छायांकनमा दिव्य सुवेदी छन्।