काठमाडौं, १२ असार — अभिनेत्री शिल्पा पोखरेलको प्रमुख अभिनय रहेको ‘डिभोर्स’ नामक म्युजिक भिडियो सार्वजनिक भएको छ। एलबी प्रोडक्सनको प्रस्तुति रहेको यस भिडियोमा एक डिभोर्स (सम्बन्ध विच्छेद) पछिको संवेदनशील कथा र त्यसले पार्ने भावनात्मक असरलाई उजागर गरिएको छ।

गीतमा चर्चित गायक प्रमोद खरेलसँगै अनु चौधरी र सुप्रिम मल्ल ठकुरीको स्वर रहेको छ। अनमोल विक्रमको शब्दमा ऋषि खड्काले संगीत भरेका छन्। भिडियोलाई विक्रम चौहानले निर्देशन गरेका हुन्।

भिडियोमा शिल्पा पोखरेलसँगै कलाकारहरू विक्रम बुढाथोकी, एलेक्स खड्का र रमेश अधिकारीको अभिनय देख्न सकिन्छ। भावनात्मक र सन्देशमूलक कथावस्तुले सुसज्जित भिडियोले विवाह, सम्बन्ध, र व्यक्तिगत स्वतन्त्रताको विषयलाई प्रभावकारी ढंगले चित्रण गरेको छ।

प्रकाशन क्रममा एलबी प्रोडक्सनले भनेको छ, “सम्बन्ध टुट्नु सधैं दुखद हुन्छ, तर कहिलेकाहीं टुटफुटकै माझमा आत्म–सम्मान बाँच्छ, स्वतन्त्रता फक्रन्छ, अनि आत्म–परिचय पुनः जन्मिन्छ। विवाहलाई जीवनको अन्तिम सत्य मान्नुपर्ने होइन। कहिलेकाहीं त्यही विवाह नर्क सावित हुन्छ।”

एलबी प्रोडक्सनले थप जोड दिएको छ, “समाजको डर, लाज र परम्पराको नाममा धेरैले आफूलाई हराइरहेका छन्। तर अस्वस्थ सम्बन्धमा बाँचेको जीवन, एक्लो तर शान्त जीवनभन्दा महान् कहिल्यै हुन सक्दैन।”

‘डिभोर्स’ भिडियो LB PRODUCTION युट्युब लगायत डिजिटल प्लेटफर्ममा उपलब्ध छ।