काठमाडौ ,जेठ २६,निर्देशक राज बहादुर सानेको निर्देशनमा निर्माण भएको नेपाली फिल्म ‘सिटामोल’का तीनवटा नयाँ पोस्टर सार्वजनिक भएका छन्, जसले दर्शकमाझ उत्सुकता बढाउने विश्वास निर्माण टोलीले व्यक्त गरेको छ।

पहिलो पोस्टरमा सौगात मल्ल, बेनिशा हमाल, र बाल कलाकार करण नेपाली भावुक मुद्रामा प्रस्तुत छन्, जुन दृश्यले परिवारबीचको भावनात्मक सम्बन्धको आभास दिन्छ। दोस्रो पोस्टरमा भने सौगात र बेनिशासँगै श्रीकृष्ण निरौला, जानुका विश्वकर्मा, र लोकेन्द्र लेखक पनि देखिन्छन्, आ–आफ्नो पात्र अनुरूपको मूडमा। तेस्रो पोस्टरमा भने केवल सौगात मल्ललाई देखाइएको छ, जहाँ उनी बैशाखीको सहारामा निराश मुद्रामा हिँडिरहेका देखिन्छन्।

साउन २३ गतेबाट प्रदर्शनमा आउने यो फिल्ममा सौगात, बेनिशा, श्रीकृष्ण, जानुका र करणसँगै लोकेन्द्र लेखक, भूगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल, र बाल कलाकार आराध्या राज्यलक्ष्मी डिसीको समेत अभिनय रहेको छ।

फिल्म ‘सिटामोल’ले नेपाली समाजमा गहिरो गरी बसेका परम्परागत सोच, विकृति र कुसंस्कारमाथि प्रश्न उठाउने उद्देश्य राखेको निर्माण पक्षको भनाइ छ। निर्देशक साने र लेखक प्रदीप भारद्धाजको लेखनमा तयार भएको कथाले जनजीवनका वास्तविकता चित्रण गर्ने प्रयास गरेको बताइएको छ।

तुल्सी देवी फिल्म प्राली र जुनतारा फिल्मस्को सहकार्यमा निर्माण भएको यस सिनेमामा सिमोस सुनुवारको प्रस्तुती, भूगोल कुमार कार्की र विकास राज जोशीको निर्माण, अप्सरा नेपाली, अजय मल्ल, र कुमार केसी कार्यकारी निर्माताको रूपमा रहेका छन्। सह-निर्माता गंगाराम श्रेष्ठ हुन्।

प्राविधिक पक्षमा बाबुल गिरीको संगीत, कविराज गहतराजको कोरियोग्राफी, बन्दे प्रसादको सम्पादन, राजेन्द्र मोक्तानद्वारा गरिएको डिआई कलर, मुकेश शाहको साउण्ड डिजाइन, देव महर्जन र शंकर महर्जनको द्वन्द्व निर्देशन, राकेश दाहालद्वारा डिजाइन गरिएको पोस्टर, र दिव्य सुवेदीको छायांकन रहेको छ। साथै विकास तामाङ र धनबहादुर राई प्रोडक्सन म्यानेजरका रूपमा छन्।