काठमाडौं — “जिन्दगीले कहाँ पुर्‍याउँछ थाहा हुँदैन,” यो भनाइ बिक्रम गौतमको जीवनमा ठ्याक्कै मेल खान्छ। काभ्रेका स्थायी बासिन्दा बिक्रमले कक्षा ९ पछि औपचारिक पढाइ रोक्दै काठमाडौं प्रवेश गर्दा उनी ड्राइभर बन्न चाहन्थे। तर मावन नपुगेर त्यो सपना अधुरै रह्यो।

काम खोज्दै भौतारिरहेका बिक्रम नयाँ बसपार्कको एक गेस्ट हाउसमा काम गर्न पुगे— गेस्ट खोज्ने। तर त्यो काम कानुनी हिसाबले वैध थिएन। बिक्रमको आर्थिक अवस्था देखेर चिनजानको उनकी दिदीले उनलाई निशुल्क ‘बेसिक सलून कोर्स’ सिकाइदिइन्। गेस्ट हाउसमा करिब दुई वर्ष काम गर्दै बिक्रमले थप व्यावसायिक सलून तालिम समेत पूरा गरे।

घरबाट भने विदेश जान दबाब थियो। तर उनले ‘मेडिकल फेल भएँ’ भन्ने बहाना बनाएर नेपालमै केही गर्ने निर्णय गरे। त्यही बेलामा चलचित्र क्षेत्रबाट मेकअप आर्टिस्टको प्रस्ताव आयो, जसले बिक्रमको जीवनलाई नयाँ मोडमा ल्याइदियो।

चलचित्र क्षेत्रको यात्रा र सफलताको कथा

फिल्म क्षेत्रबाट प्राप्त अवसरलाई उपयोग गर्दै बिक्रमले मेकअप आर्टिस्टको रूपमा काम गर्न थाले। सुरुवातमै आफ्नो प्रतिभा र परिश्रमबाट उनले चाँडै सबैको ध्यान तान्न सफल भए। आज उनी नेपाली फिल्म उद्योगका अग्रणी मेकअप आर्टिस्टहरूमध्ये एक बनेका छन्।

उनले चलचित्र, म्युजिक भिडियो र विज्ञापनमा हजारौं प्रोजेक्टमा मेकअप आर्टिस्टका रूपमा योगदान दिइसकेका छन्। उनका पछिल्ला चर्चित फिल्महरूमा ‘लाज शरणम्’, ‘बरीष्ठ बलराम’, ‘झिल्को’ र हालै प्रदर्शनमा आएको ‘अब चाहिँ नयाँ प्रोजेक्ट – द ब्लू लाइट मा आवद्द छन ।

सलून व्यवसाय र परिवारको साथमा आत्मनिर्भरता

बिक्रमले अहिले कपन र बनस्थली क्षेत्रमा दुई वटा सलून सञ्चालन गरिरहेका छन्, जुनसँगै एकेडेमी पनि संलग्न छ। उक्त व्यवसायमा उनी आफ्नी श्रीमती, दुई जना भाइ र भाउजुहरूसँगै प्रत्यक्ष संलग्न छन्। उनीहरू सँगै बसेर व्यवसाय सञ्चालन गर्नु आफैँमा उदाहरणीय बनेको छ।

औपचारिक शिक्षा छाडेका बिक्रमले पछिल्लो समय +2 पनि पूरा गरेका छन्, जसले सिकाइको कुनै उमेर हुँदैन भन्ने सन्देश दिन्छ।

समापनमा…

कक्षा ९ मा पढाइ छाडेका बिक्रम गौतमले जीवनका अनेक मोड पार गर्दै चलचित्र क्षेत्रका एक सफल मेकअप आर्टिस्ट र व्यवसायी बन्न सफल भएका छन्। उनको संघर्ष र सफलताको यात्रा प्रेरणादायी मात्र नभई, नेपाली युवा पुस्ताका लागि सम्भावनाको ढोका पनि हो।