काठमाडौँ:- जेठ २०,लेखक तथा निर्देशक चन्द्र पन्तको निर्देशनमा बन्न लागेको बहुप्रतिक्षित नेपाली फिल्म ‘आ बाट आमा’ मा पल शाह मुख्य भूमिकामा अनुबन्ध भएका छन्। विपना थापापछि सार्वजनिक भएको दोस्रो प्रमुख कलाकारको नाम पल शाहले फिल्मप्रेमीहरूमा उत्सुकता थपेको छ।

पल शाहले स्क्रिप्ट पढेपछि भावुक अनुभव गर्दै फिल्ममा काम गर्न राजी भएको बताएका छन्। उनका अनुसार, “सबैभन्दा पहिले त स्क्रिप्ट एकदमै मन पर्‍यो। निकै इमोसनल थियो। चन्द्र पन्त दाइको ‘ह्रस्व दीर्घ’ हेर्दा उहाँको मेकिङ राम्रो लागेको थियो, त्यसैले यो फिल्म पनि उत्कृष्ट बन्नेमा विश्वस्त छु।”

पलले फिल्ममा आफूले निर्वाह गर्ने भूमिकाबारे भने हाल खुलाउन चाहेका छैनन्। उनले स्क्रिप्ट २–३ पटक सुनिएको र हरेकचोटि आफू सहित उपस्थित सबै भावुक भएको बताए।

यसअघि सार्वजनिक गरिएको थिम पोष्टरमा “आमाको आँखाबाट झर्ने आँसुलाई बच्चाको हातले थाम्ने प्रयास” देखाइएको छ, जसले फिल्मको भावनात्मक गहिराइ झल्काउँछ।

निर्देशक चन्द्र पन्तले यस फिल्ममार्फत आमा र सन्तानबीचको सम्बन्धको संवेदनशील पक्षलाई उजागर गरिने बताएका छन्। पन्तको निर्देशनमा यसअघि आएको ‘ह्रस्वदीर्घ’ दर्शकले निकै मन पराएका थिए, जसपछि यो दोस्रो फिल्म हो जहाँ उनले विपना थापा र अहिले पल शाहसँग सहकार्य गर्दैछन्।

अभिमन्यू निरवीद्वारा लेखिएको स्क्रिप्टमा आधारित यो फिल्म फाल्गुन १५, २०८१ गते प्रदर्शनमा आउने तय भएको छ।

निर्माण पक्षले अन्य कलाकार र प्राविधिकहरूको नाम चाँडै सार्वजनिक गरिने जानकारी दिएको छ।