काठमाडौं । अभिनेता सलोन बस्नेत र करिश्मा केसी बस्नेत पहिलो पटक एउटै म्युजिक भिडियोमा देखिएका छन्। उनीहरूले गायिका समीक्षा अधिकारी र गायक आमेश भण्डारीको स्वर रहेको गीत ‘फिक्का फिक्का’ मा एकसाथ अभिनय गरेका हुन्। प्रेमभावमा आधारित यो गीतको भिडियो शुक्रबार सार्वजनिक गरिएको हो।

भिडियोमा सलोन र करिश्माको जोडी निकै आकर्षक देखिएको छ। प्रेमिल भाव बोकेको गीतको शब्द र संगीत आमेश भण्डारीले तयार पारेका हुन् भने संगीत संयोजन विश्व अधिकारीले गरेका छन्। गीतको शब्द सुन्दा आमेशले विशेषगरी सलोन र करिश्मालाई ध्यानमा राखेर लेखेको आभास हुन्छ।

यसअघि आमेशले सलोनको डेब्यु प्रोडक्सन फिल्म ‘रंगी’ मा स्वर दिएका थिए। तर ‘फिक्का फिक्का’ गीतमा भने उनले संगीत, शब्द र गायनमा समेत समर्पित भई नयाँ प्रस्तुति दिएका छन्। गायिका समीक्षा अधिकारीको मीठो स्वरले गीतलाई झनै सशक्त बनाएको छ।

भिडियोको कोरियोग्राफी दावा बल तामाङले गरेका छन् भने निर्देशन ख्यातिप्राप्त कोरियोग्राफर तथा निर्देशक कविराज गहतराजले गरेका छन्। सौरभ लामाको टिमले खिचेको भिडियोको सम्पादन दिनसन शाहले गरेका छन्।

भिडियो गायिका समीक्षा अधिकारीको आधिकारिक युट्युब च्यानलमार्फत हेर्न सकिन्छ।